زانکۆی پۆلیتەکنیکی هەولێر دیدارێک بۆ مامۆستا دڵشاد وەسانی رێکدەخات

زانکۆی پۆلیتەکنیکی هەولێر دیدارێک بۆ مامۆستا دڵشاد وەسانی رێکدەخات

رۆژی سێ شەممە رێکەوتی 1ـی ئاداری 2022 کاتژمێر 3ـی دوانیوەڕۆ لە هۆڵی بونەکانی سەرۆکایەتی زانکۆ دیداری زانکۆی پۆلیتەکنیکی هەولێر بۆ نووسەر و رۆژنامەنووس مامۆستا دڵشاد وەسانی لە ژێر ناونیشانی بارزانی نەمر.. رابەرێک لە سەدەی بیستەمدا بەڕێوەچوو.

بە ئامادەبوونی سەرۆکی زانکۆ پ.ی.د. کاوە عبدالکریم شێروانی و ئازاد جوندیانی ڕاوێژكاری ڕوناكبیری و سیاسی سەرۆک مەسعود بارزانی، هەردوو بەرپرسی ناوچەی ئاسۆ لاوەند دزەیی و بەرپرسی ناوچەی ئایندە کوان قەساب و بەڕێوبەری لە گشتی وەزارەتی رۆشنبیری هەڵگورد جوندیانی و ژمارەیەک لە ئەندامانی ئەنجومەنی زانکۆ و مامۆستایان و قوتابیانی زانکۆ لە یادی 43 ساڵەی کۆچی دوایی، بە دەقیقەیەک وەستان بۆ گیانی پاکی شەهیدانی کوردستان و گوێگرتن لە سرودی ئەی رەقیب دیدارەکە دەستی پێکرد.

سەرەتا سەرۆکی زانکۆی پۆلیتەکنیکی هەولێر پ.ی.د. کاوە شێروانی وتەیەکی کورتی پێشکەش کرد و تیایدا بەخێرهاتنی پانێڵیست و میوان و بەرپرسانی حیزبی و حکومی کرد.

دواتردەست کرا بە پێشکەش کردنی دیدارەکە و مامۆستا دڵشاد باسی لە سەرەتاکانی ژیانی بارزانی نەمر کرد و قۆناغ بە قۆناغ باسی رۆڵی بارزانی لە شۆڕشەکانی ساڵی 1931-1932 بۆ بەرگریکردن لە میحوەرەکانی ”مێرگەسوور و شێروان” کرد.

پاشان باسی لە قۆناغی دامەزراندنی کۆماری مهاباد کرد کە بارزانی نەمر بە فەرماندەی سوپای کۆماری کوردستان دەستنیشان کرا و پلەی “جەنەڕاڵ”ـی پێ بەخشرا.

هەروەها بە وردی باسی لە قۆناغی دوای کۆماری مهاباد و چوونی بارزانی و هاوەڵانی بۆ یەکێتی سۆڤێتی جاران و گەڕانەوەیان بە سەروەری و ڕێز و شکۆیەکی زۆرەوە پێشوازیی لێ کرانیان لەلایەن خەڵکەوە کرد.

هەروەها باسی لە  ‌ئەیلوول کرد کە مەلا مستەفا بارزانی دژی دەسەڵاتدارانی بەغدا ڕایگەیاند و ھەتا 11ی ئازاری ساڵی 1970 بەردەوام بوو.

شۆڕشی ئەیلول بە سەرکردایەتی بارزانی نەمر، دەسەڵاتدارانی عێراقی ناچاری گفتوگۆ کرد و ڕێککەوتنی ئاداری 1970ی لێ کەوتەوە کە بەپێی بڕگە و ماددەکانی ئەو ڕێککەوتنە، کورد ھاوبەش دەبێت لە حوکمڕانیی عێراق و بۆ یەکەم جاریش زمانی کوردی لە دامودەزگاکانی فێرکردن، دەبێتە زمانی فەرمی، جگە لەوەی سیستەمی حوکمی زاتی لە کوردستاندا جێبەجێ دەکرێت و کورد لە ناوچەکەی خۆیدا حوکمی خۆی دەکات.

پاشان مامۆستا دڵشاد باسی لە کۆمەڵێک بەسەرهات و روداوی مێژووی کرد کە بارزانی چەند بە تەنگ پێکەوەژیانی ئاشتییانەی ئاین و ئاینزا و کەمە نەتەوەییەکان بووە بەڵگەش بۆ ئەوە بوونی چەندین بەرپرس و هاوەڵ کە کورد و موسوڵمان نەبوون و لە دەوری بارزانی بوون.

پاشان دەرگای پرسیار و گفتوگۆ بەڕووی ئامادەبوواندا کرایەوە پرسیارەکانیان ئاراستە کرد و لە لایەن پانێڵیستەوە وەڵام درانەوە.

لە کۆتاییشدا سەرۆکی زانکۆ پ.ی.د. کاوە شێروانی سوپاس و پێزانینی بەخشییە مامۆستا دڵشاد و سوپاسی بەرێزیانی کرد بۆ پێشکەش کردنی سیمنارەکە.